O Multiusos Fontes do Sar, en participación co clube Match Up Basket 3×3 e coa empresa especializada en aluguer de pistas e canastras de baloncesto Auriabasquetpro, unidas no seu afán de promocionar e difundir o 3×3 en Galicia, inauguraron esta semana a primeira pista oficial indoor permanente desta modalidade deportiva na nosa comunidade.

A pista ubícase no hall principal do Multiusos Fontes do Sar e estará operativa en todo o horario de apertura da instalación (de luns a venres de 7 a 23h, sábados de 9 a 20h e domingos de 9 a 14h), agás cando se celebren partidos ou eventos, ou cando sexa preciso instalar a pista noutro emprazamento. Poderán utilizala libremente os abonados/as dos centros MultiSan, e todas aquelas persoas que paguen a súa correspondente entrada. Amais, o equipo de 3×3 Match Up realizará aí os seus adestramentos habituais.

Na pista programaranse asimesmo accións puntuais para fomentar o 3×3 en colaboración co xogador Alberto Corbacho que axudarán a promocionar esta modalidade do baloncesto, tales como xornadas de portas abertas ou sesións puntuais de tecnificación. O vindeiro mércores 22 de xaneiro, en horario de 17 a 19h, celebrarase a primeira tarde de acceso libre para coñecer o 3×3 da man do ex xogador obradoirista.