Os cento cincuenta rapaces que estes días asisten ao campus do Multiusos Fontes do Sar rematarán esta semana cunha xornada dedicada á alimentación saudable, con especial incidencia na concienciación sobre o consumo de azucre, a cargo de Lucas Requeixo, de Ultralimento. Ofreceranse tres obradoiros entre as 9:40h e as 13h deste venres nos que os asistentes aprenderán a importancia de comer ben pola nosa saúde e pola do planeta.

Nos talleres os nenos cociñarán receitas alternativas a produtos de consumo habitual nos almorzos e nas merendas infantís. Prepararán o pacacao, en lugar do cacao soluble que se adoita botar ó leite; a sicilla, que substituiría a crema de cacao para untar no pan; e as garrapiñadas de sésamo e as “bombas de saúde”, que son barriñas enerxéticas saudables. Os rapaces aprenderán qué azucres son bos, cales non o son tanto, cómo os procesa o noso corpo, e como cociñar doces no fogar para a familia.